თბილისი, 6 თებერვალი — Sputniik. საქართველოს ნაკრებს ძიუდოისტებმა ონისე ბუღაძემ და ნოდარ ბერიანმა სეზონის პირველი მედლები მოუპოვეს, იუწყება ძიუდოს საერთაშორისო ფედერაციის (IJF) ოფიციალური ვებ-გვერდი.
ევროპის ღია თასზე, რომელიც პორტუგალიის ქალაქ ოდიველაშში დასრულდა, ბუღაძე 100 კგ-ზე ზევით წონით კატეგორიაში ვერცხლის მედლის პრიზიორი გახდა, ხოლო ბერიანმა ბრინჯაოს მედალი მოიპოვა 90 კგ-მდე წონით კატეგორიაში.
უნდა აღინიშნოს, რომ ტურნირზე საქართველოს ნაკრები ძირითადი შემადგენლობით არ იყო წარმოდგენილი — პორტუგალიაში ეროვნული გუნდის სათადარიგო შემადგენლობა და ახალგაზრდა სპორტსმენები იბრძოდნენ.
რაც შეეხება საქართველოს ნაკრების ლიდერებს, ისინი პარიზში იმყოფებიან და გრან-პრის სერიის სეზონის პირველი ტურნირისთვის ემზადებიან. შეჯიბრებები 11 და 12 თებერვალს გაიმართება.
