თბილისი, 1 თებერვალი — Sputnik. ზუგდიდში გარდაცვლილი 19 წლის შოთა ცირდაიას ოჯახი მის სიკვდილში ექიმებს ადანაშაულებს.
როგორც ნათესავები აცხადებენ, ახალგაზრდა საავადმყოფოში გასული წლის 17 ნოემბერს პნევმონიის დიაგნოზით მიიყვანეს, თუმცა იქ მისი მდგომარეობა სათანადოდ არ შეაფასეს და საავადმყოფოდან გამოწერეს. მოგვიანებით მისი მდგომარეობა გაუარესდა და 30 ნოემბერს ის გარდაიცვალა.
დაღუპულის ოჯახის წევრებმა ოთხშაბათს ზუგდიდის რეფერალურ საავადმყოფოსთან პროტესტი გამოთქვეს. ისინი აცხადებენ, რომ არ დაკრძალავენ მიცვალებულს, სანამ შესაბამისი ექსპერტიზა არ ჩატარდება.
„ეზოში მყავს ჯერ. კი, მიწას მივაბარე, მაგრამ ისე კი არა, როგორც ყველა მიცვალებული… სიმართლე ის არის, რომ ჩემი შვილი, 19 წლის შოთიკო მომიკლეს ამ დასაწვავ საავადმყოფოში“, — განაცხადა გარდაცვლილის დედამ, ირინე წურწუმიამ.
ის ასევე ამტკიცებს, რომ ექიმებმა ავადმყოფობის ისტორია გააყალბეს. მედიკოსები კი აცხადებენ, რომ პაციენტს შესაბამისი მკურნალობა ჩაუტარეს.
„ავადმყოფი ჩვენ კლინიკაში გადიოდა მკურნალობას ორმხრივი მწვავე პნევმონიის დიაგნოზით. მიუხედავად ჩატარებული ადეკვადური მკურნალობისა, პაციენტის მდგომარეობა დამძიმდა და რეფერირებისას, სამწუხაროდ, გარდაიცვალა“, — განაცხადა კლინიკის ექიმმა ნიკა ჭედიამ.
მისი თქმით, ეს საქმე საქართველოს ჯანდაცვის სამინისტროს სამედიცინო საქმიანობის სახელმწიფო რეგულირების სააგენტომ უნდა შეისწავლოს და მიიღოს შესაბამისი გადაწყვეტილება.
