თბილისი, 25 იანვარი — Sputnik. 153–ე ბაგა–ბაღის აღსაზრდელის მშობელი აღმზრდელს ბავშვის ცემაში ადანაშაულებს, იუწყება ტელეკომპანია იმედი.
შემთხვევა მუხიანში მოხდა. მშობლის ვარაუდით, მისი შვილი პედაგოგმა სცემა. მისივე თქმით, იგი მას შემდეგ დაეჭვდა, რაც ბავშვის სახეზე დაზიანებები და სილურჯეები შენიშნა.
დედამ გამოიძახა საპატრულო პოლიცია, რის შემდეგაც ბავშვი იაშვილის სახელობის ბავშვთა კლინიკაში გადაიყვანეს.
„სახლში, რომ მივედი, დავეჭვდი, რატომ ჰქონდა ბავშვს სილურჯეები და ჩაქცევები ყურის ბიბილოებში. ბავშვმა მითხრა, რომ თამუნა მასწავლებელმა სცემა. გამოვიძახე პატრული. გადაგვიყვანეს საავადმყოფოში, სადაც დაგვიდასტურეს, რომ ბავშვს ჰქონდა დაზიანებები სახის და კისრის არეში“, – განაცხადა ბავშვის დედამ ოლიკო თითიაშვილმა.
კლინიკაში ადასტურებენ, რომ ბავშვს აღენიშნება დაზიანებები სახისა და კისრის არეში, თუმცა ექიმებს დაზიანების გამომწვევ მიზეზზე საუბარი არ შეუძლიათ.
პედაგოგი ცემის ფაქტს არ ადასტურებს.
აღნიშნულ ფაქტთან დაკავშირებით ბაღების მართვის სააგენტომ დაიწყო მოკვლევა. პედაგოგი უკვე დაბარებულია სააგენტოში.
საქმეზე გამოძიება დაიწყო 126-ე მუხლით, რაც არასრულწლოვანის მიმართ დანაშაულის ჩადენას გულისხმობს და ისჯება ოთხიდან ექვს წლამდე თავისუფლების აღკვეთით.
