თბილისი, 21 იანვარი — Sputnik. ვაშინგტონის პოლიციამ 217 ადამიანი დააკავა აშშ-ის არჩეული პრეზიდენტის, დონალდ ტრამპის ინაუგურაციის დღეს, იუწყება საინფორმაციო სააგენტო РИА Новости ვაშინგტონის პოლიციის შეფის მოვალეობის შემსრულებელ პიტერ ნიუსემზე დაყრდნობით.
ნიუსემის თქმით, დაკავებისას ექვსი პოლიციელი უმნიშვნელოდ დაშავდა.
„კანონდამრღვევი პირები, რომლებიც დილიდან მონაწილეობდნენ ინციდენტებში, დააპატიმრეს და ბრალად უწესრიგობის მოწყობა წაუყენეს“, — განაცხადა პიტერ ნიუსემმა პრესკონფერენციაზე.
დღის განმავლობაში ქალაქში დემონსტრანტებსა და პოლიციელებს შორის რამდენჯერმე მოხდა შეტაკება. თავდამსხმელები ამტვრევდნენ ვიტრინებსა და მანქანების მინებს, ხოლო ქალაქის ცენტრში ლიმუზინიც კი დაწვეს.
აღსანიშნავია, რომ ტრამპის ინაუგურაციის დღეს მასშტაბური დემონსტრაციები DisruptJ20-ის („ჩაშალე 20 იანვარი“) აქტივისტთა ჯგუფმა და ასევე მსოფლიოში ცნობილმა ორგანიზაცია Demand Protest-მა დააანონსეს.
