თბილისი, 20 იანვარი — Sputnik. დონალდ ტრამპი აშშ-ის პრეზიდენტის უფლებამოსილების აღსრულებას შეუდგა. მან აშშ-ის უზენაესი სასამართლოს თავმჯდომარის ჯონ რობერტსის თანდასწრებით დადო ფიცი.
70 წლის ბიზნესმენმა ტრამპმა, რომელიც აშშ-ის 45-ე პრეზიდენტი გახდა, ქვეყნის სახელმწიფო მეთაურის პოსტზე ბარაკ ობამა შეცვალა, რომელმაც საპრეზიდენტო უფლებამოსილების ორი ვადა დაასრულა.
„მე, დონალდ ტრამპი, საზეიმოდ ვფიცავ, რომ ერთგულად ვუხელმძღვანელებ აშშ-ის პრეზიდენტის ადმინისტრაციას და გავაკეთებ ჩემი შესაძლებლობის მაქსიმუმს, რათა მოვუარო, გავუფრთხილდე და დავიცვა აშშ-ის კონსტიტუცია“, — განაცხადა ტრამპმა ფიცის დადებისას.
მას შემდეგ, რაც აშშ-ის პრეზიდენტ ტრამპს უზენაესი სასამართლოს თავმჯდომარემ ჯონ რობერტსმა მიულოცა, დონალდ ტრამპი ოჯახის წევრებისკენ მიბრუნდა და გადაეხვია მათ.
