თბილისი, 18 იანვარი — Sputnik. თბილისის მეტროპოლიტენი ჩვეულ რეჟიმში მუშაობს, გუშინ გაჩენილი პრობლემები აღმოფხვრილია, აცხადებენ თბილისის სატრანსპორტო კომპანიის „ცხელ ხაზზე“.
გუშინ, საღამოს თბილისის მეტროპოლიტენის სამ სადგურზე — „გურამიშვილი“, „სარაჯიშვილი“, „ახმეტელის თეატრი“ — ძაბვის ცვალებადობის გამო საათნახევრის განმავლობაში მოძრაობა შეჩერდა.
„ამჟამად მეტრო ჩვეულ რეჟიმში მუშაობს, ძაბვასთან დაკავშირებული ყველა პრობლემა გადაჭრილია“, — განაცხადა „ცხელი ხაზის“ ოპერატორმა.
მეტროპოლიტენი დედაქალაქის ერთ-ერთი მთავარი სატრანსპორტო არტერიაა.
ქალაქის ერთი ბოლოდან მეორეში გასვლა მეტროპოლიტენით 40 წუთშია შესაძლებელი. ამჟამად თბილისის მეტროპოლიტენი 22 სადგურს ითვლის, რომლებიც ორ ხაზზეა განლაგებული — ახმეტელი-ვარკეთილის და საბურთალოს. მეტროპოლიტენის ხაზების საერთო სიგრძე 53,7 კილომეტრია.
