თბილისი, 15 იანვარი — Sputnik. მამაკაცი, რომელიც ცეცხლსასროლი იარაღიდან დაჭრეს, კვირას დილით საავადმყოფოში გარდაიცვალა, იუწყება ტელეარხი „იმედი“.
უგონო მდგომარეობაში მყოფი მამაკაცი რესპუბლიკურ საავადმყოფოში შაბათს მოათავსეს, სადაც მას სასწრაფო ოპერაცია ჩაუტარდა, თუმცა მისი გადარჩენა ექიმებმა ვერ შეძლეს. სამედიცინო დაწესებულებაში მომხდარზე კომენტარს არ აკეთებენ.
ინციდენტი შარტავას ქუჩაზე მოხდა, პოლიცია შემთხვევის ადგილზე ადგილობრივმა მცხოვრებლებმა გამოიძახეს.
შსს-ს ინფორმაციით, სავარაუდო დამნაშავის ვინაობა დადგენილია და ამ ეტაპზე მისი ძებნის ოპერაცია ტარდება.
სისხლის სამართლის საქმე „განზრახ მკვლელობის“ მუხლითაა აღძრული, რაც 7-დან 15-წლამდე ვადით თავისუფლების აღკვეთას ითვალისწინებს.
