თბილისი, 9 იანვარი— Sputnik. „ფოლკსვაგენ–გოლფისა“ და „ვაზ–2106“-ის მარკის ავტომანქანების შეჯახების შედეგად ერთი მამაკაცი დაიღუპა, იტყობინება საინფორმაციო სააგენტო „ნოვოსტი-გრუზია“ შინაგან საქმეთა სამინისტროს პრეს-სამსახურზე დაყრდნობით.
„ვაზ–2106“-ის მარკის ავტომანქანის გარდაცვლილი მძღოლი 70 წლამდე იყო, შეჯახება კი იმდენად ძლიერი იყო, რომ ის ადგილზევე გარდაიცვალა. მეორე მანქანის მძღოლს უმნიშვნელო დაზიანებები აღენიშნებოდა, იუწყება „რუსთავი 2“.
წინასწარი მონაცემებით, მომხდარის მიზეზი სიჩქარის გადაჭარბება გახდა.
მომხდარ ფაქტთან დაკავშირებით გამოძიება სსკ-ის 276-ე მუხლის მე-5 ნაწილით დაიწყო, რაც გულისხმობს „ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა“, რაც ისჯება თავისუფლების აღკვეთით 4-დან 7 წლამდე ვადით.
