თბილისი, 5 იანვარი — Sputnik. საქართველოს შინაგან საქმეთა სამინისტროს თანამშრომლებმა ცეცხლსასროლი იარაღისა და საბრძოლო მასალის უკანონო შეძენა-შენახვის ბრალდებით თბილისში 1989 წელს დაბადებული გ.მ დააკავეს, იუწყება შინაგან საქმეთა სამინისტროს პრეს-სამსახური.
ბრალდებული წარსულში მრავალჯერ ნასამართლევია. იგი სამართალდამცველებმა ავტოსადგურ „ოკრიბას“ მიმდებარე ტერიტორიაზე დააკავეს.
„კალაშნიკოვის“ სისტემის არარეგისტრირებული ავტომატური ცეცხლსასროლი იარაღი და 3 საბრძოლო ვაზნა პოლიციამ ნივთმტკიცების სახით ამოიღო.
გამოძიება ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის ფაქტზე მიმდინარეობს საქართველოს სსკ-ის 236-ე მუხლით, რაც 3-დან 5 წლამდე თავისუფლების აღკვეთას ითვალისწინებს.
