თბილისი, 3 იანვარი — თბილისი. თურქეთის პოლიციამ სამშაბათს, ღამით, სტამბულში მომხდარ ტერაქტში ეჭვმიტანილის სამძებრო სპეცოპერაცია ჩაატარა, რომელმაც ახალი წლის ღამეს ერთ-ერთ ღამის კლუბში ადამიანებს ცეცხლი გაუხსნა, იუწყება სააგენტო „რია ნოვოსტი“ გაზეთ Daily Sabah-ზე დაყრდნობით.
გამოცემის ცნობით, სამართალდამცველებმა სპეცოპერაცია ზეითინბურნუს რაიონში ჩაატარეს.
თავის მხრივ, სააგენტო „ასოშეიტედ-პრესმა“ სპეცოპერაციის დასრულების შესახებ ინფორმაცია გაავრცელა. სააგენტოს ცნობით, პოლიციამ დამნაშავის დაკავება ვერ შეძლო.
მანამდე გავრცელდა ინფორმაცია, რომ სტამბულში ღამის კლუბში მომხდარ ტერაქტზე პასუხისმგებლობა საკუთარ თავზე ტერორისტულმა დაჯგუფება „ისლამურმა სახელმწიფომ“ აიღო.
სტამბულში ღამის კლუბ Reina-ზე შეიარაღებული თავდასხმა ახალი წლის ღამეს მოხდა. ავტომატით შეიარაღებულმა ტერორისტმა კლუბის დაცვის პოლიციელი მოკლა, შენობაში შეიჭრა, სადაც 700-ზე მეტი ადამიანი იმყოფებოდა და ცეცხლი გახსნა.
თურქეთის შსს-ს მონაცემებით, ტერაქტს 39 ადამიანი (მათ შორის, 16 უცხოელი) ემსხვერპლა, 69-მ სხეულის დაზიანებები მიიიღო. თავდამსხმელის სამძებრო ოპერაციები ამ დრომდე გრძელდება.
