თბილისი, 27 დეკემბერი — Sputnik. სრულიად საქართველოს კათოლიკოს–პატრიარქს ილია მეორეს გამოკვლევები კლინიკური მედიცინის სამეცნიერო–კვლევით ინსტიტუტში უტარდება, იუწყება საინფორმაციო სააგენტო „ნოვოსტი–გრუზია“ საპატრიარქოზე დაყრდნობით.
ქართული მართლმადიდებლური ეკლესიის წინამძღვარს ვირუსული ინფექცია და მაღალი სიცხე ჰქონდა. მას შემდეგ, რაც კათოლიკოს–პატრიარქი უკეთ გახდა, გამოკვლევებისთვის კლინიკაში გადაიყვანეს.
„პატრიარქის მდგომარეობა დამაკმაყოფილებელია, ის თავს ნორმალურად გრძნობს. სიცხემ იკლო. ამჟამად, პროფილაქტიკისა და შესაძლო გართულებების თავიდან არიდების მიზნით, შესაბამისი კვლევები უტარდება“, – განაცხადა საპატრიარქოს ჯანდაცვის დეპარტამენტის ხელმძღვანელის მოადგილემ ცისანა შარტავამ.
ილია მეორე ჯანმრთელობის მდგომარეობის გაუარესებისა და მაღალი სიცხის გამო თავისი აღსაყდრების 39-ე წლისთავისადმი მიძღვნილ საზეიმო ლიტურგიას ვერ დაესწრო. ლიტურგია 25 დეკემბერს სამების ტაძარში ჩატარდა.
