თბილისი, 25 დეკემბერი — Sputnik. სრულიად საქართველოს კათალიკოს-პატრიარქ ილია მეორეს, ვირუსული ინფექციის ფონზე, მაღალი ტემპერატურა აქვს, იუწყება საინფორმაციო სააგენტო "Новости-Грузия" საპატრიარქოს ჯანდაცვის დეპარტამენტის ხელმძღვანელის მოადგილე ცისანა შარტავაზე დაყრდნობით.
მისი უწმინდესობა ჯანმრთელობის მდგომარეობის გაუარესების გამო აღსაყდრებიდან 39-ე იუბილისადმი მიძღვნილ საზეიმო ლიტურგიას ვერ დაესწრო.
„ამ დროისათვის პატრიარქის მდგომარეობა დამაკმაყოფილებელია. დინამიკა ასევე დადებითია. ავადმყოფობა მაღალი ტემპერატურის ფონზე მიმდინარეობს. სპეციალისტები ყველაფერს აკეთებენ, რათა შესაძლო გართულებები თავიდან აიცილონ“, — აღნიშნა შარტავამ.
საზეიმო ლიტურგიას, რომელიც სამების საკათედრო ტაძარში მეუფე დანიელმა აღავლინა, ესწრებოდნენ წმინდა სინოდის წევრები, კიევისა და სრულიად უკრაინის მიტროპოლიტი ონუფრი და მისი დელეგაციის წევრები.
უკრაინელი სასულიერო პირები საქართველოში სპეციალურად ილია მეორის ინტრონიზაციის იუბილეზე დასასწრებად ჩამობრძანდნენ.
