თბილისი, 19 დეკემბერი — Sputnik. საქართველოს პრემიერ–მინისტრმა გიორგი კვირიკაშვილმა თურქეთში რუსეთის ელჩის, ანდრეი კარლოვის მკვლელობასთან დაკავშირებით მწუხარება გამოთქვა.
კარლოვზე თავდასხმა ორშაბათს ანკარაში მოხდა. რუსეთის საგარეო საქმეთა სამინისტროს ინფორმაციით, ელჩი საჯარო ღონისძიებაზე დაჭრეს და ამის შედეგად გარდაიცვალა. რუსეთის საგარეო უწყება მომხდარს ტერაქტად აფასებს.
„21–ე საუკუნისთვის უპრეცედენტო ძალადობისა და დაპირისპირებების მომსწრენი ვართ. ჩვენ ვდგავართ ცივილიზებული ქვეყნების გვერდით და არასოდეს შევეგუებით ამ უკიდურეს სისასტიკეს. ჩვენი მიზანია მშვიდობა რეგიონში და ყველაფერს გავაკეთებთ იმისათვის, რომ ხელი შევუწყოთ სტაბილურობასა და განვითარებას“, – დაწერა პრემიერმა „ფეისბუქის“ საკუთარ გვერდზე.
