თბილისი, 19 დეკემბერი – Sputnik. საქართველოში ფულადი გადმორიცხვების მოცულობით რუსეთი ლიდერობს – ნოემბერში ამ ქვეყნიდან 35,4 მილიონ აშშ დოლარზე მეტი გადმოირიცხა, რაც მიმდინარე წლის ოქტომბრის მონაცემებთან შედარებით 2,4%-ით მეტია, აღნიშნულია საქართველოს ეროვნული ბანკის ვებ-გვერდზე განთავსებულ განცხადებაში.
რუსეთზე ნოემბრის თვეში ელექტრონული სისტემებით ქართულ კომერციულ ბანკებში ფულადი გადმორიცხვების საერთო მოცულობის 36,2% მოდის. ნოემბრის თვეში სხვადასხვა ქვეყნიდან საქართველოში სულ 97,8 მლნ აშშ დოლარი გადმოირიცხა.
ამასთან, რუსეთიდან ფულადი გადმორიცხვები, გასულ წელთან შედარებით, შემცირდა. მიმდინარე წლის იანვარ–ნოემბრის პერიოდში რუსეთიდან საქართველოში 8%-ით ნაკლები თანხა შემოვიდა, ვიდრე გასული წლის საანგარიშო პერიოდში (391 მლნ აშშ დოლარი).
2016 წლის 11 თვეში რუსეთიდან ფულადი გადმორიცხვების საერთო მოცულობამ 353 მლნ აშშ დოლარზე მეტი შეადგინა.
