თბილისი, 19 დეკემბერი – Sputnik. ბელარუსის საგარეო საქმეთა მინისტრი ვლადიმირ მაკეი სამშაბათს საქართველოს ორდღიანი ოფიციალური ვიზიტით ეწვევა, იუწყება საქართველოს საგარეო საქმეთა სამინისტროს პრეს–სამსახური.
ვიზიტის ფარგლებში 20 დეკემბერს გაიმართება საქართველოში ბელარუსის რესპუბლიკის საელჩოს გახსნის ოფიციალური ცერემონია, რომელშიც ორი ქვეყნის საგარეო საქმეთა მინისტრები მიიღებენ მონაწილეობას.
მაკეი შეხვდება საქართველოს აღმასრულებელი და საკანონმდებლო ხელისუფლების წარმომადგენლებს და საქართველო კათოლიკოს–პატრიარქს ილია მეორეს.
საქართველოში მიმდინარე წლის დასაწყისში ბელარუსის პრეზიდენტის ალექსანდრ ლუკაშენკოს ვიზიტისას მიღწეულ იქნა შეთანხმება საელჩოს გახსნის შესახებ. აგვისტოს ბოლოს ბელარუსის დიპლომატიური მისიის ხელმძღვანელმა მიხაილ მიატლიკოვმა საქართველოს საგარეო საქმეთა მინისტრს მიხეილ ჯანელიძეს რწმუნების სიგელები გადასცა.
ბელარუსში საქართველოს საელჩო 2007 წელს გაიხსნა, ის მინსკის ცენტრში მდებარეობს. საქართველომ და ბელარუსმა დიპლომატიური ურთიერთობები 1994 წლის 6 იანვარს დაამყარეს.
