თბილისი, 18 დეკემბერი — Sputnik. მარნეულში, ბოლნისსა და ჭიათურაში წყალმომარაგების და კანალიზაციის სისტემების რეაბილიტაცია განხორციელდება.
პროექტის ღირებულება, რომელიც აზიის განვითარების ბანკის (ADB) ფინანსური მხარდაჭერით განხორციელდება, 99 მილიონ დოლარს შეადგენს, ნათქვამია საქართველოს ფინანსთა სამინისტროს ვებ-გვერდზე გამოქვეყნებულ მასალებში.
ინფრასტრუქტურის მშენებლობა „ურბანული მომსახურების გაუმჯობესების საინვესტიციო პროგრამა — პროექტი 6-ის “ ფარგლებში განხორციელდება.
პროექტს განახორციელებს საქართველოს რეგიონული განვითარებისა და ინფრასტრუქტურის სამინისტრო და საქართველოს გაერთიანებული წყალმომარაგების კომპანია, რომელთანაც აზიის განვითარების ბანკმა საპროექტო ხელშეკრულებას მოაწერა ხელი. პროექტის განხორციელება 2017 წელს დაიწყება და დაახლოებით ორ წელიწადში დასრულდება.
საქართველოში 2011-2019 წლებში ურბანული მომსახურების გაუმჯობესების პროექტების დასაფინანსებლად საქართველოსა და აზიის განვითარების ბანკს (ADB) შორის 2011 წელს ხელი მოეწერა „ურბანული მომსახურების გაუმჯობესების საინვესტიციო პროგრამის“ დაფინანსების ჩარჩო ხელშეკრულებას (FFA) 500 მლნ აშშ დოლარის ოდენობის სესხზე.
პროგრამა ითვალისწინებს წყალმომარაგებისა და კანალიზაციის სისტემის გასაუმჯობესებლად პროექტების განხორციელებას ქვეყნის 7 ტურისტულ ცენტრსა და მსხვილ ურბანულ დასახლებაში (მესტია, ანაკლია, ქუთაისი, ფოთი, ურეკი, ზუგდიდი, მარნეული).
FFA-ის ფარგლებში ამჟამად მიმდინარეობს ხუთი პროექტი, რომელთა ჯამური ღირებულება დაახლოებით 401 მლნ აშშ დოლარია.
