თბილისი, 10 დეკემბერი — Sputnik. დედაქალაქში, რუსთაველის გამზირზე მიმდინარე არასამთავრობო ორგანიზაციების საპროტესტო აქციაზე სამართალდამცავებმა რამდენიმე პირი დააკავეს. ამის შესახებ ტელეკომპანია „რუსთავი 2“ იტყობინება.
აქცია ადამიანის უფლებათა დაცვის საერთაშორისო დღესთან დაკავშირებით იმართება და მისი სახელწოდებაა "დეკრიმინალიზაცია 2016".
არასამთავრობო ორგანიზაციები საქართველოში არსებულ ნარკოპოლიტიკას უპირისპირდებიან.
მოძრაობის წევრებს მიაჩნიათ, რომ სწორედ ეს თარიღი უნდა იქცეს 10-წლიანი რეპრესიული ნარკოპოლიტიკის სიმბოლური დასასრულის დღედ.
ისინი მოუწოდებენ პარლამენტს და მასში შემავალ პოლიტიკურ პარტიებს, დაიწყონ ქმედითი ნაბიჯების გადადგმა ნარკოპოლიტიკის ლიბერალიზაციის მიმართულებით.
ტელეკომპანიის ინფორმაციით აქციაში, რომელიც რუსთაველის გამზირზე მიმდინარეობს, 50-მდე აქტივისტი იღებს მონაწილეობას. მათ გზის სავალი ნაწილი გადაკეტეს და ამის გამო პარლამენტის შენობასთან დაპირისპირება მოხდა პოლიციასა და აქტივისტებს შორის.
