თბილისი, 8 დეკემბერი — Sputnik. ესტონეთის სახელმწიფოს მეთაური კერსტი კალიულაიდი საქართველოს 2017 წელს ეწვევა, ნათქვამია საქართველოს პრეზიდენტის ადმინისტრაციის განცხადებაში.
დაგეგმილი ვიზიტის შესახებ ცნობილი პარიზში „ღია პარტნიორობის მეოთხე გლობალური სამიტის“ (OGP) ფარგლებში საქართველოსა და ესტონეთის პრეზიდენტების შეხვედრის შემდეგ გახდა.
კალიულაიდმა აღნიშნა, რომ ესტონეთი საქართველოსთან ორმხრივ და მრავალმხრივ ფორმატებში თანამშრომლობას გააგრძელებს.
მარგველაშვილმა, თავის მხრივ, ესტონელ კოლეგას მადლობა გადაუხადა საქართველოს სუვერენიტეტისა და ტერიტორიული მთლიანოობის, ასევე ქვეყნის ევროპულ და ევროატლანტიკურ სტრუქტურებში ინტეგრაციის პროცესში მხარდაჭერისთვის.
საქართველოსა და ესტონეთს შორის დიპლომატიური ურთიერთობა 1992 წლის 16 ივნისიდან იღებს სათავეს. ქვეყნები თანამშრომლობენ თავდაცვის, უსაფრთხოების, ეკონომიკის, ტურიზმის, განათლების, კულტურისა და გარემოს დაცვის სფეროებში.
