თბილისი, 19 ნოემბერი — Sputnik. უკრაინული ავიაკომპანია DART-ი 23 დეკემბრიდან კვირაში ორჯერ ავიარეისებს კიევი-თბილისი-კიევი რეგულარულად — პარასკევსა და კვირას განახორციელებს, ნათქვამია საქართველოს ეკონომიკის სამინისტროს სამოქალაქო ავიაციის სააგენტოს ვებ-გვერდზე.
DART-ი ავიაფრენებს Airbus 320 და 321 ტიპის თვითმფრინავებით განახორციელებს.
დღეისათვის კიევსა და თბილისს შორის ავიაფრენებს ავიაკომპანიები Ukraine International Airlines-ი და YANAIR-ი ახორციელებს.
ქართულ ავიაბაზარზე 33 ავიაკომპანია ოპერირებს, რომლებიც 46 მიმართულებით მსოფლიოს 20 ქვეყანაში დაფრინავენ.
საქართველოს აეროპორტების გავლით 2016 წლის იანვარ-სექტემბრის პერიოდში 2,2 მილიონმა ადამიანმა იმგზავრა, რაც 23%-ით მეტია წინა წლის ანალოგიურ პერიოდთან შედარებით. აქედან, 91%-ს უცხოური ავიაკომპანიები, ხოლო 9%-ს — ქართული კომპანიები მოემსახურნენ.
