თბილისი, 17 ნოემბერი — Sputnik. თბილისის გარეუბნებში — კოჯორსა და ბეთანიაში თოვლი მოვიდა. ამის გამო გზის გაწმენდითი სამუშაოები მთელი ღამის განმავლობაში საგანგებო რეჟიმში მიმდინარეობდა.
ამ დროისთვის ტრანსპორტი დაბრკოლების გარეშე გადაადგილდება. თუ რაიმე პრობლემა შეიქმნა, კომპანია „თბილსერვის–ჯგუფი“ მოსახლეობას სთხოვს, დარეკონ „ცხელ ხაზზე“.
სინოპტიკოსები თბილისში უნალექო ამინდს პროგნოზირებენ. პარასკევს ღამით პლუს სამი, ხოლო დღისით — პლუს რვა გრადუსი იქნება.
შაბათს თბილისში ღრუბლიანი ამინდია მოსალოდნელი, დღისით ხანმოკლე წვიმა იქნება. ღამით მინუს 1°, დღისით კი 6° იქნება.
კვირას კი თბილისში ღრუბლიანი და ნისლიანი ამინდია მოსალოდნელი, დღისით ხანმოკლე წვიმა იქნება. ღამით პლუს 2°, დღისით კი 6° იქნება. დაუბერავს 10-15 მ/წმ სიძლიერის ქარი.
გასულ კვირაში თბილისში ჰაერის ტემპერატურა 20 გრადუსამდე თბებოდა.
