თბილისი, 16 ნოემბერი — Sputnik. საქართველოს საპარლამენტო დელეგაცია მონაწილეობას მიიღებს ნატოს საპარლამენტო ასამბლეის 62-ე ყოველწლიური სესიაში, რომელიც 18-21 ნოემბერს გაიმართება სტამბულში.
საერთაშორისო ფორუმში ნატოს წევრი და ასოცირებული ქვეყნების ქვეყნების 257 კანონმდებელი დელეგატი მიიღებს მონაწილეობას.
ქართულ დელეგაციას პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი უხელმძღვანელებს.
„აღსანიშნავია, რომ ნატოს 2017 წლის საპარლამენტო ასამბლეის საგაზაფხულო სესიას 26-29 მაისს საქართველოს დედაქალაქი უმასპინძლებს. საქართველო რიგით მეხუთე არაწევრი ქვეყანა იქნება, სადაც ნატოს საპარლამენტო ასამბლეა გაიმართება. აღნიშნულიდან გამომდინარე, სტამბულში სესიის მსვლელობისას საქართველოს საიმიჯო ვიდეორგოლის პრეზენტაცია და ქართული ღვინის დეგუსტაცია გაიმართება“, — ნათქვამია პარლამენტის ინფორმაციაში.
საკომიტეტო და პლენარულ სხდომებზე ასამბლეის დელეგატები მსოფლიოს მასშტაბით უსაფრთხოების, სამშვიდობო მისიების, ტერორიზმის, პოლიტიკურ და ეკონომიკურ საკითხებზე იმსჯელებენ.
