თბილისი, 15 ნოემბერი — Sputnik. ქართულმა ტელეარხმა „ტაბულამ“ მაუწყებლობა დროებით შეაჩერა ფორმატის ცვლილების მიზეზით.
„ტაბულა“ მაუწყებლობის ფორმატის ცვლილებას და ტექნიკურ განახლებას გეგმავს.
ამ მიზნით, 2017 წლის შემოდგომამდე, სატელევიზიო გადაცემები მხოლოდ ტელეარხის საიტის და ტაბულას FB-გვერდის მეშვეობით გავრცელდება. განახლებული სატესტო მაუწყებლობა ზაფხულიდან დაიწყება”, — ნათქვამია ტელეარხის ვებ-გვერდზე.
ტელეარხისა და ჟურნალ „ტაბულას“ ხელმძღვანელი თამარ ჩერგოლეიშვილი „ერთიანი ნაციონალური მოძრაობის“ ერთ-ერთი ლიდერის გიგა ბოკერიას მეუღლეა. 2010 წელს „ტაბულა“ სამოქალაქო განათლების ფონდმა დააფუძნა. მას შემდეგ გამოიცემოდა ჟურნალი „ტაბულა“, 2012 წელს კი ფონდმა სატელევიზიო სიხშირე შეიძინა და 2013 წლიდან ტელემაუწყებლობა დაიწყო.
