თბილისი, 10 ივნისი — Sputnik. მმართველ პარტიაში „ქართული ოცნება — დემოკრატიული საქართველო“ დარწმუნებული არიან, რომ საქართველოსა და აშშ-ს შორის თანამშრომლობა დონალდ ტრამპის საპრეზიდენტო არჩევნებში გამარჯვების შემდეგ ახალი ენერგიით გაგრძელდება.
ტრამპმა პრეზიდენტის სავარძლისთვის ბრძოლაში „დემოკრატი“ ჰილარი კლინტონი დაამარცხა. ის აშშ-ის 45-ე პრეზიდენტი გახდება.
„ამერიკის შეერთებულ შტატებთან საქართველოს აკავშირებს 25-წლიანი სტაბილური სტრატეგიული პარტნიორობა. ჩვენი ურთიერთობები ვითარდებოდა ყველა ხელისუფლების მმართველობის პირობებში სხვადასხვა სტრატეგიული მიმართულებით. დარწმუნებული ვართ, რომ პრეზიდენტ ტრამპის ხელმძღვანელობით, საქართველო-აშშ-ს შორის არსებული თანამშრომლობა ახალი ენერგიით გაგრძელდება მშვიდობის, უსაფრთხოების, თავისუფლებისა და ეკონომიკური განვითარების უზრუნველსაყოფად“, — აღნიშნულია პარტიის განცხადებაში.
კიდევ ერთხელ ვადასტურებთ მზადყოფნას, კონგრესის ახალ შემადგენლობასთან და ახალ ადმინისტრაციასთან ერთად ქვეყნებს შორის განვაგრძოთ და გავაღრმავოთ პარტნიორობა და მეგობრობა, აცხადებენ პარტიაში.
8 ნოემბრის კენჭისყრის მიმდინარეობისას აშშ-ის მოქალაქეებმა ამომრჩევლების ორპარტიული კოლეგია ჩამოაყალიბეს (538 ადამიანი). მათ 19 დეკემბერს ქვეყნის პრეზიდენტი ფორმალურად უნდა აირჩიონ.
ტრამპს 280-ზე მეტი ამომრჩევლის ხმა აქვს, გამარჯვებისთვის კი 270-ც საკმარისია. ჰილარი კლინტონმა დამარცხება აღიარა.
