თბილისი, 9 ნოემბერი — Sputnik. საქართველოს პრეზიდენტი გიორგი მარგველაშვილი საშიშროებას ვერ ხედავს იმაში, რომ მმართველმა პარტიამ „ქართული ოცნება — დემოკრატიული საქართველო“ პარლამენტში საკონსტიტუციო უმრავლესობა მიიღო, მაგრამ ფიქრობს, რომ საზოგადოებაში, შესაძლოა, უნდობლობა გაჩნდეს.
„ქართულმა ოცნებამ“, წინასწარი შედეგებით, საპარლამენტო არჩევნების შედეგად პარლამენტში 115 ადგილი, ანუ საკონსტიტუციო უმრავლესობა მიიღო, რაც მას კონსტიტუციის შეცვლის საშუალებას აძლევს.
„რეალურად, თუ ვამბობთ, რომ დემოკრატიულ პროცესს რაღაც ემუქრება, ეს არ ეხება თეორიულ საკონსტიტუციო უმრავლესობას და იმას, რა კანონებს მიიღებს პარლამენტი“, — განაცხადა მარგველაშვილმა ტელეკომპანია „რუსთავი2“-თან ინტერვიუში.
საშიშროება ისაა, რომ საზოგადოებაში, შესაძლოა, საქართველოში პოლიტიკური ცხოვრების დასრულების შეგრძნება გაჩნდეს, მიიჩნევს პრეზიდენტი.
„ზოგიერთმა პოლიტიკურმა ლიდერმა განაცხადა, რომ მიდის პოლიტიკიდან, და რეალურად ორპოლუსიანი თამაშის წესები მივიღეთ. და ეს ემოცია, და არა ის, რომ საკონსტიტუციო უმრავლესობა რეალურად წარმოადგენს რაიმე საფრთხეს, შეიძლება გადავიდეს საზოგადოებაში და საზოგადოება დაიჯერებს, რომ დემოკრატიული პროცესები, პლურალიზმი და ძალთა ბალანსი არ მუშაობს“, — აღნიშნა მარგველაშვილმა.
მეცხრე მოწვევის პარლამენტში მეორე მნიშვნელოვანი მოთამაშე „ერთიანი ნაციონალური მოძრაობაა“, რომელმაც 27 სადეპუტატო მანდატი მიიღო.
პარლამენტში ასევე მოხვდა „პატრიოტთა ალიანსი“ (6 ადგილი), ერთი დეპუტატი ჰყავს „მრეწველებს“ და ასევე დეპუტატი გახდა სალომე ზურაბიშვილი, რომელმაც დამოუკიდებელი კანდიდატის სახით იყარა კენჭი.
