თბილისი, 7 ნოემბერი — Sputnik. საქართველოს მესამე პრეზიდენტის მიხეილ სააკაშვილის მეუღლემ სანდრა რულოვსმა ცესკოს აცნობა, რომ უარს ამბობს დეპუტატის მანდატზე.
სანდრა რულოვსი „ერთიანი ნაციონალური მოძრაობის“ სიაში რიგით მეორე ნომერი იყო. მას შემდეგ, რაც 8 ოქტომბერს გამართულ საპარლამენტო არჩევნებში ენმ-მ 27 მანდატი მოიპოვა, სანდრა რულოვსი დეპუტატი გახდა.
„სანდრა რულოვსმა გვაცნობა თავისი განზრახვის შესახებ. საქართველოს ცესკო არ არის უფლებამოსილი დეპუტატები თანამდებობიდან გაათავისუფლოს. ეს პარლამენტმა უნდა გააკეთოს მას შემდეგ რაც შეიკრიბება. ცესკო პარლამენტს მხოლოდ მისი ადგილმონაცვლის სახელს წარუდგენს“, — უთხრეს საინფორმაციო სააგენტო „ნოვოსტი-გრუზიას“ ცესკოს პრესსამსახურში.
წინასწარი მონაცემებით, რულოვსის ადგილს პარლამენტში ენმ-ს სიის 28-ე ნომერი, კახეთის ექს-გუბერნატორი გიორგი ღვინიაშვილი დაიკავებს.
არჩევნების წინასწარი შედეგებით, „ქართული ოცნება-დემოკრატიული საქართველო“ პარლამენტში 117 ადგილს მიიღებს, „ერთიანი ნაციონალური მოძრაობა“ – 27 ადგილს, ხოლო საარჩევნო ბლოკი „დავით თარხან-მოურავი, ირმა ინაშვილი — საქართველოს პატრიოტთა ალიანსი, გაერთიანებული ოპოზიცია“ – 6 ადგილს.
