სამართალდამცველებმა პროსტიტუციისთვის ადგილის გადაცემის ბრალდებით სამი პირი დააკავეს

თბილისი, 6 ნოემბერი – Sputnik. შსს–ს თანამშრომლებმა პროსტიტუციისთვის ადგილის გადაცემის ბრალდებით თბილისში სამი პირი დააკავეს, იუწყება სამინისტროს პრეს–სამსახური.

დაკავებული არიან თბილისში სასტუმროს, ბარებისა და ჩინური მასაჟის სალონის ადმინისტრატორები, აქედან ორი – ჩინეთის მოქალაქეა.

„გამოძიებამ დაადგინა, რომ ბრალდებულები გარკვეული პერიოდის განმავლობაში, გასამრჯელოს სანაცვლოდ, ქალბატონებს პროსტიტუციისთვის ფართს უთმობდნენ“, – აღნიშნულია განცხადებაში.

მოწმის სახით დაკითხულია სასტუმროების პერსონალი. 

აღძრულია სისხლის სამართლის საქმე საქართველოს სსკ–ის მუხლით „პროსტიტუციისთვის ადგილის ან საცხოვრებლის გადაცემა“. დანაშაული ისჯება ჯარიმით ან თავისუფლების აღკვეთით ორიდან ოთხ წლამდე.