თბილისი, 3 ნოემბერი — Sputnik. ქართულ სცენაზე პირველად დადგამენ ფსიქოლოგიური დეტექტივის ჟანრის სპექტაკლს — „სხვების ცხოვრების“ პრემიერა თბილისის „თავისუფალ თეატრში“ 5 ნოემბერს გაიმართება.
სპექტაკლის რეჟისორი და ავტორია ავთანდილ ვარსიმაშვილი, რომელმაც ეს წარმოდგენა გერმანელი რეჟისორის ხენკელ ფონ დონერსმარკის ამავე სახელწოდების ფილმით შთაგონებულმა დადგა.
„სპექტაკლი, რომელიც არავის დატოვებს გულგრილს, პირველად ქართულ სცენაზე ნამდვილი ფსიქოლოგიური დეტექტივი. სპექტაკლი იმაზე, რაც ასე გვაწუხებს ყველას: თვალთვალზე, ჩვენ პირად ცხოვრებაში სახელმწიფოს ხელის ფათურზე“, — აღნიშნულია თეატრის განცხადებაში.
„სხვების ცხოვრება“ მოგვითხრობს, თუ როგორ შეიძლება ადამიანისთვის ყველაზე საშიში აღმოჩნდეს ყველაზე უსაფრთხო და კომფორტული ადგილი — საკუთარი სახლი, სადაც მას უსმენენ და მის ყოველ ნაბიჯს უთვალთვალებენ. ვარსიმაშვილის განცხადებით, მან გერმანელი რეჟისორის ფილმი ქართულ რეალობას მოარგო, რადგან მიიჩნევს, რომ ეს თემა საქართველოში აქტუალურია და ქართულ საზოგადოებას აღელვებს.
