თბილისი, 14 ოქტომბერი– Sputnik. საქართველოში საპარლამენტო არჩევნების საბოლოო შედეგების გამოცხადების შემდეგ უმრავლესობის მოპოვების შემთხვევაში მმართველი პარტია "ქართული ოცნება-დემოკრატიული საქართველო" ქვეყნის მოქმედ პრემიერ-მიონისტრ გიორგი კვირიკაშვილს მთავრობის მეთაურის პოსტზე წარადგენს, განაცხადა პარტიის პოლიტსაბჭოს წევრმა მამუკა მდინარაძემ.
საბოლოო შედეგების გამოცხადებისთანავე საქართველოს მთავრობა პრემიერ-მინისტრის მეთაურობით უნდა გადადგეს, ხოლო პარტია, რომელიც საპარლამენტო არჩევნების შედეგების თანახმად მინიმუმ 76 ადგილს მოიპოვებს, პრემიერ-მინისტრის პოსტზე თავის კანდიდატს წარადგენს, რომელიც ახალ მთავრობას ჩამოაყალიბებს.
"ჩვენი გუნდი პრემიერ-მინისტრის პოსტზე გიორგი კვირიკაშვილს ხედავს, რადგან ის საქართველოსთვის საუკეთესო პრემიერ-მინისტრია",-განაცხადა მამუკა მდინარაძემ.
მდინარაძემ ასევე განაცხადა, რომ ახალ მთავრობაში გარკვეული ცვლილებები იგეგმება.
"მთავრობაში გარკვეული ცვლილებები მოხდება, თუმცა არა კარდინალური. საბოლოოდ ამასთან გავერკვევით იმის შემდეგ, როდესაც გვეცოდინება, ვინ იქნება პარლამენტში",-აღნიშნა მან.
საპარლამენტო არჩევნების წინასწარი შედეგების თანახმად, საქართველოს პარლამენტი საბოლოოდ ჩამოყალიბებული არ არის. ამჟამად საკანონმდებლო ორგანოს 150 ადგილიდან დაკავებულია 100. დანარჩენი ადგილები ერთმანდატიან ოლქებში არჩევნების მეორე ტურის შედეგების მიხედვით გადანაწილდება.
ბოლო მონაცემების მიხედვით პარტიას "ქართული ოცნება-დემოკრატიული საქართველო" 67 ადგილი აქვს, "ერთიან ნაციონალურ მოძრაობას"-27, "პატრიოტთა ალიანსს"-6.
