თბილისი, 12 ოქტომბერი – Sputnik. მთავარმა ოპოზიციურმა პარტია „ერთიანმა ნაციონალურმა მოძრაობამ“, რომელმაც საპარლამენტო არჩევნებზე მეორე ადგილი მოიპოვა, პარლამენტში შესვლა გადაწყვიტა, განაცხადა პარტიის ლიდერმა დავით ბაქრაძემ ჟურნალისტებთან საუბრისას.
საქართველოს მოსახლეობამ მეცხრე მოწვევის პარლამენტის დეპუტატები 8 ოქტომბერს აირჩია. ცესკოს ბოლო მონაცემებით, მმართველი პარტია „ქართული ოცნება — დემოკრატიული საქართველო“ ამომრჩეველთა ხმების 48,67%-ს აგროვებს, ოპოზიციური პარტია „ერთიანი ნაციონალური მოძრაობა“ — 27,11%-ს. პარლამენტში ასევე შედის ბლოკი „დავით თარხან-მოურავი, ირმა ინაშვილი — საქართველოს პატრიოტთა ალიანსი, გაერთიანებული ოპოზიცია“, რომელმაც მინიმალური 5%-იანი ზღვარი გადალახა. რაც შეეხება ერთმანდატიან ოლქებს, მეორე ტური 73 ოლქიდან 50-ში ჩატარდება. 23 ოლქში მმართველმა პარტიამ უკვე გაიმარჯვა.
„ვერ მივცემთ ივანიშვილის რეჟიმს ფუფუნებას, რომ ქვეყანაში ერთპარტიული მმართველობა ჩამოყალიბდეს. სწორედ ამიტომ მივიღეთ გადაწყვეტილება, რომ უთანაბრობის, გაყალბების მიუხედავად, პარტია შევა პარლამენტში და, ასევე, მიიღებს მონაწილეობას მეორე ტურში“, — განაცხადა ბაქრაძემ.
მან აღნიშნა, რომ ნაციონალური მოძრაობა გამოიყენებს პარლამენტს, კანონიერ აქციებს, კავშირებს საზღვარგარეთ იმისთვის, რათა საქართველო ერთპარტიულ ქვეყნად არ გადაიქცეს.
საქართველოში საპარლამენტო არჩევნები შერეული სისტემით ჩატარდა: 77 დეპუტატი პროპორციული, ხოლო 73 — მაჟორიტარული სისტემით აირჩევა.