თბილისი, 7 ოქტომბერი — Sputnik. კანადური ექსპორტის ხელშეწყობის სააგენტო (EDC) მზადაა, მსხვილი საინვესტიციო პროექტების დასაფინანსებლად საქართველოს 120-150 მლნ აშშ დოლარის ოდენობის გრძელვადიანი სესხი გამოუყოს.
EDC დაინტერესებულია საქართველოს საინვესტიციო პოტენციალით და გრძელვადიან თანამშრომლობას გეგმავს, განაცხადეს სააგენტოს წარმომადგენლებმა საქართველოს ფინანსთა მინისტრ ნოდარ ხადურთან შეხვედრისას.
შეხვედრას ესწრებოდნენ კანადური კომპანია BEHLEN Industries-ის წარმომადგენლები, რომელიც საქართველოში საინვესტიციო პროექტებს ახორციელებს, ნათქვამია საქართველოს ფინანსთა სამინისტროს განცხადებაში.
პირველ ეტაპზე კომპანია თელავში, ბათუმსა და გორში სპორტულ კომპლექსებს ააშენებს, რომელთა საერთო ღირებულება დაახლოებით 33,9 მლნ აშშ დოლარს შეადგენს.
