თბილისი, 4 ოქტომბერი — Sputnik. 53 წლის მამაკაცი პოლიციაში მივიდა და განაცხადა, რომ საქართველოს თავდაცვის ყოფილი მინისტრის ირაკლი ოქრუაშვილის წინასაარჩევნო შეხვედრაზე შეკრებილ ადამიანებს ესროლა, აღნიშნულია შსს-ს ვებგვერდზე განთავსებულ განცხადებაში.
ინციდენტი გასულ კვირას მოხდა. სროლისას ორი ადამიანი დაიჭრა.
პოლიციაში გამოცხადებული მამაკაცი დააკავეს. სამართალდამცველებმა დაადგინეს, რომ ის წარსულში ნასამართლევია.
შსს დაკავებულის ვინაობას არ ასახელებს, მხოლოდ მის ინიციალებს — ა. ი. მიუთითებს.
ოქრუაშვილმა, რომელიც არჩევნებზე გორის რაიონში დამოუკიდებელი კანდიდატია, თავდასხმის ორგანიზებაში „ქართული ოცნება“ დაადანაშაულა და მსროლელის ვინაობაც, ადრე არაერთხელ ნასამართლევი — ალექსანდრე ინდუაშვილი დაასახელა.
გამოძიება დამამძიმებელ გარემოებაში განზრახ მკვლელობის მცდელობის და ცეცხლსასროლი იარაღის მართლსაწინააღმდეგო შეძენა-შენახვა-ტარების ფაქტზე მიმდინარეობს (საქართველოს სსკ-ის 19-109-ე და 236-ე მუხლებით). დაკავებულს 15 წლამდე პატიმრობა ემუქრება.
