თბილისი, 21 სექტემბერი – Sputnik. საქართველოს ელჩმა აზერბაიჯანში თეიმურაზ შარაშენიძემ თავდაცვის მინისტრ ზაქირ გასანოვს საელჩოს სამხედრო ატაშე გიორგი კვირიკაშვილი წარუდგინა, აღნიშნულია აზერბაიჯანის საგარეო საქმეთა სამინისტროს განცხადებაში.
საქართველოს შეიარაღებული ძალების პოლკოვნიკი გიორგი კვირიკაშვილი საქართველოს თავდაცვისა და საგარეო საქმეთა სამინისტროებმა აზერბაიჯანში სამხედრო ატაშედ სამი თვის წინ დანიშნეს.
„თავდაცვის მინისტრმა სამხედრო ატაშეს დანიშვნა მიულოცა და ორი ქვეყნის შეიარაღებულ ძალებს შორის თანამშრომლობის გაფართოების სფეროში მომავალ საქმიანობაში წარმატებები უსურვა“, – ნათქვამია განცხადებაში.
შარაშენიძემ, კვირიკაშილმა და გასანოვმა შეხვედრაზე იმსჯელეს შეიარაღებული ძალების განვითარების სფეროში საქართველოსა და აზერბაიჯანის თანამშრომლობის პერსპექტივებზე, რეგიონში არსებულ სამხედრო–პოლიტიკურ ვითარებაზე, რეგიონისთვის მთიანი ყარაბახის კონფლიქტის გადაჭრის მნიშვნელობაზე და სხვა, აღნიშნეს აზერბაიჯანის თავდაცვის უწყებაში.
საქართველოს კანონის „დიპლომატიური სამსახურის შესახებ“ თანახმად, სამხედრო ატაშე მაღალი დიმპლომატიური თანამდებობის პირად ითვლება.
ატაშეს საქართველოს თავდაცვის მინისტრი საგარეო საქმეთა მინისტრთან შეთანხმებით ნიშნავს.
