თბილისი, 16 სექტემბერი – Sputnik. ორი წლის განმავლობაში თბილისში კაპიტალურად შეაკეთეს 200 ქუჩა, ამაზე 85 ათას 119 ლარი დაიხარჯა, განაცხადა დედაქალაქის მერმა დავით ნარმანიამ უწყების ორწლიანი მუშაობის შესახებ ანგარიშის პრეზენტაციაზე.
„2014 წლიდან 2016 წლის საანგარიშო პერიოდში გზის სარეაბილიტაციო სამუშაოები ჩატარდა 2,874 402 მ2 ფართზე“, – განაცხადა ნარმანიამ.
რაც შეეხება საინჟინრო ნაგებობებსა და ინფრასტრუქტურული ობიექტების მშენებლობას, ასევე მათ აღდგენასა და რეკონსტრუქციას, მერის განცხადებით, ორი წლის განმავლობაში სამუშაოები ჩატარდა 58 ობიექტზე და ჯამურად 33 მლნ 382 ათასი ლარი დაიხარჯა.
ავარიული სახლების გამაგრების სამუშაოები ჩატარდა 316 ობიექტზე. ამაზე 35 მლნ ლარზე მეტი დაიხარჯა; ხოლო საპროექტო დოკუმენტაცია 4,5 მლნ ლარის თანხის 149 პროექტისთვის მომზადდა.
გარდა ამისა, წყალდიდობის შედეგების ლიკვიდაციაზე, რომელიც თბილისში 2015 წლის ივნისში მოხდა, 90 მლნ ლარი დაიხარჯა.
