თბილისი, 15 სექტემბერი — Sputnik. საქართველოს სახელმწიფო სკოლებსა და საბავშვო ბაღებში ახალი სასწავლო წელი დაიწყო, რომელიც მომავალი წლის 10 ივნისამდე გაგრძელდება. არდადეგები ბავშვებს ორჯერ — ახალ წელსა და აღდგომის დღესასწაულზე ექნებათ.
სასკოლო განათლების სისტემა
წელს საქართველოს 2 ათასზე მეტმა სკოლამ თავისი კარი 565 ათას მოსწავლეს გაუღო. მათგან 60 ათასი პირველად მიუჯდება სასკოლო მერხს.
საქართველოს სახელმწიფო სკოლებსა და საბავშვო ბაღებში სწავლა უფასოა როგორც საქართველოს მოქალაქე, ისე უცხოელი ბავშვებისთვის.
საქართველოში 300-ზე მეტი სკოლა ფუნქციონირებს, სადაც სწავლა მთლიანად უცხო ენაზე მიმდინარეობს. აქედან 131 სკოლაში სწავლა სომხურ ენაზე, 121-ში — აზერბაიჯანულ, ხოლო 60 სკოლაში — რუსულ ენაზე მიმდინარეობს.
ასევე, წელს ქართულ სკოლებში სიახლე დაინერგა — ახალი სასწავლო წლიდან საქართველოს 400 სკოლაში არამარტო ტრადიციული, არამედ ელექტრონული ჟურნალები იქნება გამოყენებული, რომელშიც პედაგოგები შეიყვანენ გაკვეთილებზე დასწრების, მოსწავლეების შეფასებისა და გამოცდების შესახებ მონაცემებს.
პირველ ეტაპზე ელექტრონულ ჟურნალებს იმ სკოლებში დანერგავენ, რომლებმაც სურვილი გამოთქვეს საპილოტე პროგრამაში მონაწილეობის შესახებ.
ელექტრონული ჟურნალების უსაფრთხოება მაქსიმალურად იქნება დაცული.
ამასთან, საქართველოს განათლებისა და მეცნიერების მინისტრმა ალექსანდრე ჯეჯელავამ გუშინ ჟურნალისტებთან საუბრისას განაცხადა, რომ საქართველოში მოქმედი 20 სკოლა, მათ შორის ხუთი თბილისში, სარემონტო სამუშაოების გამო, ახალ სასწავლო წელს ორკვირიანი დაგვიანებით დაიწყებს.
