თბილისი, 12 სექტემბერი — Sputnik. ბოლო წლის განმავლობაში საქართველოში სისხლის სამართლის საქმე 24 პოლიციელზე აღიძრა, 137 კი გაათავისუფლეს, განაცხადა საქართველოს შინაგან საქმეთა მინისტრმა გიორგი მღებრიშვილმა ტელეკომპანია „იმედის“ ეთერში.
მინისტრმა ამ სტატისტიკაზე სოფელ დაფნარის 22 წლის მკვიდრის დემურ სტურუას თვითმკვლელობის საქმეზე კომენტარისას განაცხადა. სტურუამ თვითმკვლელობის წინ წერილი დატოვა, რომელშიც პოლიციელის მხრიდან ზეწოლაზე საუბრობდა. მას შემდეგ, რაც საქმე გახმაურდა, რაიონის ინსპექტორ-გამომძიებელი გოდერძი თევზაძე თანამდებობიდან გათავისუფლდა და მიიმალა.
„საქმე წარმოებაში აქვს მთავარ პროკურატურას და მე არ ვარ უფლებამოსილი, რომ გავამჟღავნო რაღაც დეტალები და ვისაუბრო მთავარი პროკურატურის წარმოებაში არსებულ სისხლის სამართლის საქმეზე. მე დაველოდები გამოძიების შედეგებს, დაველოდები სასამართლოს განაჩენს და შესაბამისად, მივიღებ ადეკვატურ გადაწყვეტილებას ადგილზე არსებულ მენეჯმენტთან მიმართებაში“, — განაცხადა მღებრიშვილმა.
საქართველოს სამართალდამცველ ორგანოებში 40 ათასამდე ადამიანი მუშაობს, მათგან უმეტესი წესიერი პროფესიონალია და არ შეიძლება ყველა პოლიციელი ერთი ადამიანის მიხედვით განვსაჯოთ, რომელიც შეცდა, აღნიშნა მინისტრმა.
ერთი წლის განმავლობაში, მღებრიშვილის მინისტრობის პერიოდში, ცუდი მუშაობისთვის თანამდებობიდან დააქვეითეს 12 სამართალდამცველი, მკაცრი გაფრთხილება მისცეს 604 პოლიციელს, გაფრთხილება — 402-ს, შენიშვნა კი — 731 პოლიციელს.
გიორგი მღებრიშვილი შს მინისტრი 2015 წლის 1 აგვისტოდანაა.
