თბილისი, 12 სექტემბერი — Sputnik. საქართველოს განათლებისა და მეცნიერების მინისტრის მოადგილე გიორგი შარვაშიძე გათავისუფლებულია დაკავებული თანამდებობიდან. შესაბამის ბრძანებას პრემიერ-მინისტრმა გიორგი კვირიკაშვილმა მოაწერა ხელი.
ეს გადაწყვეტილება იმასთან დაკავშირებით იქნა მიღებული, რომ მიმდინარე წლის 9 სექტემბერს შარვაშიძის უფლებამოსილების ვადა ამოიწურა. უფრო ადრე მან განაცხადა, რომ, შესაძლოა, ივანე ჯავახიშვილის სახელობის თბილისის სახელმწიფო უნივერსიტეტის რექტორის თანამდებობაზე იყაროს კენჭი. არჩევნები თსუ-ში 23 სექტემბერს არის დაგეგმილი.
ამჟამად თსუ-ის რექტორის თანამდებობაზე კანდიდატების რეგისტრაცია მიმდინარეობს. დოკუმენტების შეტანის ბოლო ვადა 14 სექტემბერია. რექტორის არჩევნებში მონაწილეობა მეცნიერებათა დოქტორის ხარისხის მქონე კანდიდატებს შეუძლიათ. მათ უნდა წარადგინონ უნივერსიტეტის განვითარების კონცეფცია და გეგმა, ცნობა ნასამართლეობისა და ნარკოდამოუკიდებლობის შესახებ.
თსუ-ში რამდენიმე თვის წინ სტუდენტებმა უმაღლესი განათლების სისტემის რეფორმირების მოთხოვნით საპროტესტო აქციები დაიწყეს. ამ აქციებს რექტორის ვლადიმერ პაპავას გადადგომა მოჰყვა. ამჟამად რექტორის მოვალეობას პროფესორი დარეჯან თვალთვაძე ასრულებს.
