თბილისი, 10 სექტემბერი — Sputnik. ავტოტრანსპორტისთვის ჩაიკეტება და საფეხმავლო გახდება აღმაშენებლის გამზირი N44-დან ზაარბრიუკენის მოედნამდე (ახლადრეაბილიტირებული მონაკვეთი), ერეკლე მეორის, ბოტანიკურისა და ალექსანდრე დიუმას ქუჩები და გორგასლის I შესახვევი, ნათქვამია თბილისის მერიის ვებგვერდზე გავრცელებულ ინფორმაციაში.
თბილისის მერია დავით აღმაშენებლის გამზირზე ახორციელებს მასშტაბურ პროექტს — „ახალი ტფილისი“, რომელიც გამზირის ახალ რეკრეაციულ ზონად გადაქცევას ითვალისწინებს. გამზირის ნაწილი ქვეითად მავალთა ზონა იქნება, აქ ახალი ტურისტული მარშრუტები გაივლის. გამზირის რეაბილიტაცია მიმდინარე წლის თებერვალში დაიწყო და ეტაპობრივად ჩატარდება.
გარდა ამისა, საფეხმავლო ქუჩების სტატუსი მიენიჭა შარდენის ქუჩას, ბამბის რიგსა და რკინის რიგსაც. ქუჩების შესასვლელებში ავტომატური ჩამკეტები დამონტაჟდება. მათი მართვის პულტები მოსახლეობას გადაეცემა. საჭიროების შემთხვევაში, სასწრაფოს, სახანძროსა და პოლიციის მანქანები საფეხმავლო ქუჩებზე შესვლას შეძლებენ. მერიამ ძველი თბილისის ქუჩების საფეხმავლო ზონად გამოცხადების გადაწყვეტილება მოსახლეობის თხოვნითა და ტურისტული ინფრასტრუქტურის სტიმულირებისთვის მიიღო.
