თბილისი, 9 სექტემბერი — Sputnik. რუსეთის მოქალაქეებს, რომლებიც სახელმწიფო სათათბიროს არჩევნების დღისთვის, 18 სექტემბრისთვის საქართველოში იქნებიან, ხმის მისაცემად სომხეთში, ქალაქ გიუმრიში წასვლა მოუწევთ, იუწყება საინფორმაციო სააგენტო РИА Новости რუსეთის ცესკოს წევრ ვასილი ლიხაჩოვზე დაყრდნობით.
ლიხაჩოვის თქმით, თბილისში, შვეიცარიის საელჩოსთან არსებულ რუსეთის ფედერაციის ინტერესთა სექციაში რუსეთის მოქალაქეებისთვის საარჩევნო უბნის მოწყობა ვერ მოხერხდა.
„[შვეიცარიის საელჩოში] არ არსებობს არანაირი საშუალება, ურთიერთობის სტატუსიდან გამომდინარე, რომ საარჩევნო უბანი მოეწყოს. რუსული ელექტორალური ნაწილი, რომელიც ახლა საქართველოში ცხოვრობს, სომხეთში, გიუმრის უბანზეა მიწერილი“, — განაცხადა ლიხაჩოვმა.
რუსეთის ცესკოს წევრი განმარტავს, რომ ქალაქი გიუმრი მოსახერხებელი სატრანსპორტო მიმოსვლის გამო შეირჩა.
შეგახსენებთ. რუსეთის სახელმწიფო სათათბიროს არჩევნები 18 სექტემბერსაა დანიშნული.
