თბილისი, 9 სექტემბერი — Sputnik. სოფელ ხელვაჩაურის რაიონულმა სასამართლომ ვაჟა ხოზრევანიძე დამნაშავედ სცნო ყოფილი მეუღლის მკვლელობის მცდელობაში, ნათქვამია პროკურატურის შეტყობინებაში. საუბარია მიმდინარე წლის მარტში ჩადენილ დანაშაულზე.
2016 წლის 31 მარტს, დაახლოებით 08:00 საათზე, ქ. ბათუმში მდებარე საცხოვრებელ სახლში ვაჟა ხოზრევანიძეს ყოფილ მეუღლეთან მ.ფ-სთან საყოფაცხოვრებო ნიადაგზე ურთიერთშელაპარაკება მოუვიდა, რა დროსაც ვაჟა ხოზრევანიძემ მოკვლის მიზნით, ნაჯახით ყოფილ მეუღლეს თავის, ზურგისა და ხელის არეში სიცოცხლისთვის სახიფათო მრავლობითი ჭრილობები მიაყენა. ვაჟა ხოზრევანიძემ განზრახვის სისრულეში მოყვანა ვერ შეძლო, რადგან ფაქტის შემსწრე პირებმა მას წინააღმდეგობა გაუწიეს.
სამართალდამცველებმა ვაჟა ხოზრევანიძე იმავე დღეს შემთხვევის ადგილზე დააკავეს.
ხელვაჩაურის რაიონულმა პროკურატურამ მას ბრალდება საქართველოს სისხლის სამართლის კოდექსის 111-19-108-ე მუხლით წარუდგინა.
ხელვაჩაურის რაიონულმა სასამართლომ ვაჟა ხოზრევანიძე სრულად სცნო დამნაშავედ წარდგენილ ბრალდებაში და სასჯელის სახედ და ზომად განუსაზღვრა თავისუფლების აღკვეთა 7 წლის ვადით.
