თბილისი, 8 სექტემბერი — Sputnik. შინაგან საქმეთა სამინისტროს თანამშრომლებმა განსაკუთრებით მძიმე დანაშაულის შეუტყობინებლობის ბრალდებით სამი პირი დააკავეს, იუწყება შსს-ის პრეს-სამსახური.
ესენი არიან: 1995 წელს დაბადებული ო.გ. — დაკავებულია ზესტაფონში, 1991 წელს დაბადებული თ.შ. — დაკავებულია თეთრწყაროში, და 1996 წელს დაბადებული ს.მ. — დაკავებულია თბილისში.
საუბარია მკვლელობაზე, რომელიც რამდენიმე დღის წინ ყიფშიძის ქუჩაზე მოხდა და რა დროსაც ავტოგასამართი სახელოსნოს თანამშრომელი გარდაიცვალა. მოგვიანებით სამართალდამცავებმა მკვლელობაში ბრალდებული ზესტაფონში დააკავეს.
„გამოძიებამ დაადგინა, რომ მიმდინარე წლის 2 სექტემბერს ვაკეში მომხდარი მკვლელობის დროს აღნიშნული პირები, მკვლელობაში ბრალდებულ ბ.ნ.-სთან ერთად, თ.შ.-ს კუთვნილ ავტომანქანაში იმყოფებოდნენ, მომხდარ ფაქტს შეესწრნენ და აღნიშნულის შესახებ სამართალდამცველებს არ შეატყობინეს“, — ნათქვამია პრესსამსახურის განცხადებაში.
გამოძიება განსაკუთრებით მძიმე დანაშაულის შეუტყობინებლობის ფაქტზე მიმდინარეობს (საქართველოს სსკ-ის 376-ე მუხლით).
