თბილისი, 3 სექტემბერი — Sputnik. მოსახლეობის 32 % მზად არის მხარი დაუჭიროს მმართველ პარტიას „ქართული ოცნება —დემოკრატიული საქართველო“, ხოლო ოპოზიციურ „ერთიან ნაციონალური მოძრაობას“ – 16%. ამის შესახებ ნათქვამია კომპანია "JMP Strategic Solutions" მიერ ჩატარებულ სოციალურ კვლევაში.
კვლევა მთელი საქართველოს მასშტაბით ტელეკომპანია „იმედის“ დაკვეთით ჩატარდა 18-დან 27 აგვისტომდე. პირდაპირი ინტერვიუს გზით 1200 კაცი გამოიკითხა. ცდომილებამ 2,8% შეადგინა.
საქართველოს ექს-თავდაცვის მინისტრის პარტიას — „თავისუფალ დემოკრატებს“ რესპოდენტთა 4% აძლევს ხმას და ამომრჩეველთა იგივე რაოდენობა ყავს „ლეიბორისტულ პარტიას“. შემდეგია საოპერო მომღერლისა და მეცენატის პაატა ბურჭულაძის „სახელმწიფო ხალხისათვის“ – 3%. მხოლოდ 2% უჭერს მხარს პარლამენტის ექს-სპიკერის ნინო ბურჯანაძის პარტიას „დემოკრატიული მოძრაობა“ და ირმა ინაშვილის „პატრიოტთა ალიანსს“.
კითხვაზე „ვის მისცემდით ხმას, ხვალ რომ არჩევნები იყოს?“, პასუხი ვერ გასცა რესპოდენტთა 34%-მა. ამასთან არჩევნებზე წასვლას აპირებს რესპოდენტთა 58%.
მკვლევარები ასევე დაინტერესდნენ პარტიათა ლიდერების მიმართ ამომრჩევლების დამოკიდებულებით. ამომრჩეველის კეთილგანწყობის დადებითი ბალანსი მხოლოდ საქართველოს პრემიერს — გიორგი კვირიკაშვილს აღმოაჩნდა. გამოკითხვის თანახმად, მის მიმართ კეთილგანწყობილია ამომრჩეველთა 38% და არაკეთილგანწყობილი — 23%. რაც შეეხება „ერთიანი ნაციონალური მოძრაობის“ პირველ ნომერს — დავით ბაქრაძეს, იგი ამომრჩეველთა 30%-ს მოსწონს და არ მოსწონს — 38%-ს. მესამე ადგილზეა პაატა ბურჭულაძე — რომელიც მოსწონს 23%-ს ედა ნეგატიურად არის განწყობილი 37%.
ლეიბორისტთა ლიდერი შალვა ნათელაშვილი მოსწონს 23%-ს, არ მოსწონს — 39%-ს. შემდეგ მოდის „თავისუფალი დემოკრატების“ ლიდერი ირაკლი ალასანია, რომელიც მოსწონს 20%-ს და არ მოსწონს 38%-ს.
გამოკითხვის თანახმად, ყველაზე უარყოფითი დამოკიდებულება ამომრჩეველს ირმა ინაშვილის — 43% და ნინო ბურჯანაძის — 58% მიმართ აქვს. დადებით დამოკიდებულებას ინაშვილის მიმართ 15% ამჟღავნებს, ხოლო ბურჯანაძის მიმართ 13 %.
საპარლამენტო არჩევნები საქართველოში 8 ოქტომბერსაა დაგეგმილი.
