თბილისი, 2 სექტემბერი — Sputnik. პარიზის გარეუბანში მდებარე ლევილის მამულს საქართველოს სექტემბრის ბოლოს გადასცემენ, იუწყება დიასპორის საკითხებში სახელმწიფო მინისტრის აპარატის პრეს-სამსახური.
პარიზში 1 სექტემბერს მორიგი სამუშაო შეხვედრა გაიმართა, სადაც გადაწყდა, რომ შესაბამის ნოტარიულ აქტზე ხელმოწერის ცერემონია სექტემბრის ბოლოს ლევილის მამულში გაიმართება.
უფრო ადრე ქართულმა მხარემ ლევილის სამეურვეო საბჭოს შესთავაზა, რომ მამულის გადმოცემა ქვეყნის დამოუკიდებლობის 25 წლისთავისთვის მიეძღვნათ, თუმცა მამულის გადმოცემის ცერემონია გადაიდო.
1 სექტემბერს გამართულ შეხვედრას ესწრებოდნენ დიასპორის საკითხებში სახელმწიფო მინისტრი გელა დუმბაძე, იუსტიციის მინისტრი თეა წულუკიანი, საქართველოს საგანგებო და სრულუფლებიანი დესპანი საფრანგეთში გოჩა ჯავახიშვილი, ხოლო ფრანგული მხრიდან — ამხანაგობა „ქართული კერის“ წარმომადგენლები ირენ ციციშვილი, ეთერ ფაღავა, ელისო ტარასაშვილი, მამულის მემკვიდრეთა ოჯახების წევრები.
ლევილის მამულის საქართველოსთვის გადმოცემა 2011 წელს გადაწყდა. უკვე ცნობილია, რომ იქ ქართველი მაგისტრანტებისა და დოქტორანტებისთვის სამეცნიერო-კულტურული ცენტრი გაიხსნება.
საქართველომ ლევილის მამული 1920-იან წლებში შეიძინა, მას შემდეგ, რაც საქართველოს მენშევიკურმა მთავრობამ გასაბჭოების გამო საქართველო დატოვა და საფრანგეთში ემიგრაციაში წავიდა.
