თბილისი, 31 აგვისტო — Sputnik. საქართველოს პარლამენტის ყოფილმა თავმჯდომარემ, პარტია „დემოკრატიული მოძრაობის“ ლიდერმა ნინო ბურჯანაძემ რუსეთის პრეზიდენტ ვლადიმირ პუტინს დიდი პოლიტიკოსი უწოდა, რომელიც საკუთარი ქვეყნის ინტერესებიდან გამომდინარე მოქმედებს.
„პუტინი არ არის საქართველოს მტერი, პუტინი არის ძალიან დიდი პოლიტიკოსი და პოლიტიკოსები არც არავის მტრები არ არიან და არც არავის მეგობრები არ არიან. პოლიტიკოსები მოქმედებენ საკუთარი სახელმწიფო ინტერესებიდან გამომდინარე. ჩვენი, საქართველოს ამოცანაა, რომ პუტინი არ იყოს იძულებული, რომ საქართველოს მოექცეს, როგორც მტერს“, — განაცხადა ბურჯანაძემ ტელეკომპანია „რუსთავი 2“-ის ეთერში.
ჩვენი ამოცანაა, რუსეთი დავარწმუნოთ, რომ საქართველო რუსეთის მტერი არ არის, აღნიშნა პოლიტიკოსმა.
საქართველომ რუსეთთან დიპლომატიური ურთიერთობა მოსკოვის მიერ აფხაზეთისა და სამხრეთ ოსეთის დამოუკიდებლობის ცნობის საპასუხოდ გაწყვიტა. ახალი ხელისუფლება საქართველოს საგარეო პოლიტიკის ერთ-ერთ მთავარ პრიორიტეტად რუსეთთან ურთიერთობების მოგვარებას ასახელებდა.
