თბილისი, 26 აგვისტო — Sputnik. შოკოლადის მწარმოებელი ბელგიური კომპანია Guylian-ი აპირებს საქართველოში თხილის მოყვანასა და გადამუშავებაში ინვესტიციები დააბანდოს. კომპანიის წარმომადგენლები საქართველოში ამ სფეროში სიტუაციის შესასწავლად ჩამოვიდნენ.
როგორც კომპანია Guylian-ის წარმომადგენელმა პოლ ბევერსმა აღნიშნა, კომპანია შოკოლადის წარმოებაში ქართულ თხილს უკვე იყენებს და არის დაინტერესება თხილის წარმოების კუთხით კომპანიამ საქართველოში ინვესტიცია განახორციელოს. ამ ეტაპზე კომპანიის წარმომადგენლების საქართველოში ვიზიტის მიზანს თხილის წარმოების კუთხით საქართველოში არსებული გარემოს შესწავლა წარმოადგენს.
სოფლის მეურნეობის მინისტრის მოადგილემ დავით გალეგაშვილმა კომპანია Guylian-ის წარმომადგენლებს სახელმწიფო პროგრამის — „თხილის წარმოების განვითარება სასოფლო-სამეურნეო კოოპერაციის მხარდაჭერის გზით“ — ფარგლებში შექმნილი საქართველოში ყველაზე დიდი სასოფლო-სამეურნეო კოოპერატივის "დარჩელი თხილი“ შესახებ მიაწოდა ინფორმაცია და მისი საქმიანობის შესახებ ისაუბრა. მინისტრის მოადგილემ აღნიშნა, რომ საქართველოს სოფლის მეურნეობის სამინისტროს მიზანს წარმოადგენს სასოფლო-სამეურნეო კულტურების, მათ შორის თხილის წარმოების სრული ჯაჭვის განვითარება და ხელშეწყობა.
