თბილისი, 22 აგვისტო — Sputnik. საქართველოს პრემიერ-მინისტრმა გიორგი კვირიკაშვილმა სახელმწიფო უსაფრთხოების სამსახურს ტერორისტული აქტის მცდელობის აღკვეთისთვის მადლობა გადაუხადა.
დღეს ცნობილი გახდა, რომ საქართველოს ტერიტორიაზე გამავალი რუსეთი–სომხეთის გაზსადენის აფეთქების მცდელობისთვის შვიდი ადამიანია დაკავებული. ამ გაზსადენით რუსული ბუნებრივი აირი სომხეთს მიეწოდება.
„სახელმწიფო უსაფრთხოების სამსახურმა ძალიან ეფექტურად იმუშავა. მინდა ვისარგებლო შემთხვევით და მადლობა გამოვუცხადო ყველა იმ ადამიანს, ვინც ამ ოპერაციაში მონაწილეობდა, ვინაიდან დიდი უბედურება იქნა თავიდან აცილებული. ძალიან მნიშვნელოვანია ასეთი დროული და ეფექტური ღონისძიებების ჩატარება", — განაცხადა გიორგი კვირიკაშვილმა ჟურნალისტებთან საუბრისას.
ამასთან მთავრობის მეთაურმა გამოძიების დასრულებამდე კომენტარებისგან თავი შეიკავა.
„ერთი შეიძლება ითქვას: ცხადია, რომ ძალიან დიდი საფრთხე იქნა თავიდან აცილებული, რისთვისაც სახელმწიფო უსაფრთხოების სამსახურს მადლობა ეკუთვნის", — აღნიშნა გიორგი კვირიკაშვილმა.
გამოძიების მონაცემებით, ბრალდებულები მდინარე არაგვზე გამავალი რუსეთისა და სომხეთის დამაკავშირებელი გაზსადენის ღია მონაკვეთის აფეთქებას აპირებდნენ სოფელ საგურამოსთან. ამ მიზნის განსახორციელებლად დანაშაულებრივი ჯგუფის წევრები 20 აგვისტოს გაემგზავრნენ ჟინვალი-შატილის საავტომობილო გზის მახლობლად ტყის მასივში არსებული იარაღის სამალავიდან ასაფეთქებელი ნივთიერებების ამოსაღებად.
როგორც გამოძიება აცხადებს, ჯგუფის წევრებმა სამალავიდან ამოიღეს: 4 ცალი 200-გრამიანი ტროტილის კოჭა, ორი სახის ცეცხლგამტარი ზონარი, 5 ცალი კაფსულა დეტონატორი, ერთი ცალი ე.წ. „უემკაზე“ მუხტი, ერთი ცალი რუსული წარმოების ე.წ. „ვეზედეს“ მუხტი თავისივე ამფეთქით, რუსული წარმოების ერთი ცალი ამფეთქი.
ეს არსენალი ბოროტმოქმედებმა მოათავსეს ავტომანქანაში, რა დროსაც სუს-ის კონტრდაზვერვის დეპარტამენტის თანამშრომლებმა დააკავეს.
ამის შემდეგ გამომძიებლებმა დაათვალიერეს სამალავი, საიდანაც დამატებით ამოღებულია 3 ერთეული ავტომატური ცეცხლსასროლი იარაღი მჭიდებით და საბრძოლო მასალა. ერთ-ერთი დაკავებულის ბინაში მისი პერსონალური კომპიუტერიდან ამოღებულია რუკა, სადაც დატანილია ის ადგილები, რომლის აფეთქებასაც დანაშაულებრივი ჯგუფის წევრები გეგმავდნენ.
