თბილისი, 22 აგვისტო — Sputnik. ცენტრალურმა საარჩევნო კომისიამ (ცესკო) არჩევნებამდე თვენახევრით ადრე საქართველოს მოსახლეობას საარჩევნო სიაში საკუთარი თავის პოვნის ახალი ხერხი შესთავაზა — სწრაფი გადახდის ტერმინალები.
არჩევნები საქართველოში 8 ოქტომბერს გაიმართება.
„ცენტრალური საარჩევნო კომისია (ცესკო) ამომრჩევლებს კიდევ ერთ სიახლეს სთავაზობს: მათ ამომრჩეველთა სიაში საკუთარი მონაცემების გადამოწმება უკვე სწრაფი გადახდის ტერმინალების საშუალებითაც შეუძლიათ. ამომრჩეველთა სიაში მონაცემების გადამოწმებისას მომხმარებელი ასევე მიიღებს ინფორმაციას, თუ რომელ საარჩევნო უბანზეა რეგისტრირებული, სადაც შეუძლია ხმის მიცემა”, — აღნიშნულია ცესკოს ვებ-გვერდზე განთავსებულ განცხადებაში.
გარდა ამისა, ამომრჩეველს საკუთარი თავის პოვნა შეუძლია სპეციალურ ვებ-გვერდზე.
ამომრჩევლის რაოდენობა 3 452 093 ადამიანია. ამომრჩევლების სრულ სიაზე ხელი მიუწვდებათ პარტიებსა და საარჩევნო ბლოკებს, რომლებმაც საარჩევნო რეგისტრაცია გაიარეს, ასევე სადამკვირვებლო ორგანიზაციებს.
