თბილისი, 19 აგვისტო — Sputnik. ბრიტანელი ტელეწამყვანი ჩარლი უებსტერი, რომელიც რიო-დე-ჟანეიროში ოლიმპიადაზე სამუშაოდ იყო ჩასული და მალარიის იშვიათი ფორმით დაავადდა, ხელოვნური კომიდან გამოიყვანეს, იუწყება საინფორმაციო სააგენტო „რია ნოვოსტი“ ტელერადიოკორპორაცია „ბი-ბი-სი“-ზე დაყრდნობით.
სპორტული გადაცემების წამყვანი მონაწილეობდა საქველმოქმედო მარათონში, რა დროსაც მან ექვს კვირაში ევროპასა და ბრაზილიაში დაახლოებით 4 828 კმ დაფარა ველოსიპედით. უებსტერი გასულ პარასკევს რიო-დე-ჟანეიროს საავადმყოფოში მოათავსეს და ხელოვნურ კომაში შეიყვანეს, ვინაიდან მისი თირკმელები ნორმალურად უკვე აღარ ფუნქციონირებდა. თავდაპირველად ექიმები ფიქრობდნენ, რომ მისი ცუდად ყოფნის მიზეზი ორგანიზმის გაუწყლოვანება იყო.
ამჟამად უებსტერი ინტენსიური თერაპიის განყოფილებაშია. მას დიალიზს უკეთებენ, მაგრამ ექიმები მისი „ნევროლოგიური შედეგებით ძალზე კმაყოფილი არიან“, იუწყება „ბი-ბი-სი“.
ტელეწამყვანის წარმომადგენელმა განაცხადა, რომ ამჟამად ექიმების ყურადღება გადატანილია იმაზე, რომ უებსტერმა დიდ ბრიტანეთში გადაფრენა გართულებების გარეშე გადაიტანოს.
