თბილისი, 15 აგვისტო — Sputnik. ბათუმის სანაპიროზე დილიდან წითელი დროშებია აღმართული, რაც გაფრთხილების ნიშანია, რომ ზღვაში ბანაობა შტორმის შემდეგ კვლავ საშიშია, იუწყება საინფორმაციო სააგენტო „ნოვოსტი-გრუზია“ ბათუმის ბულვარის ადმინისტრაციაზე დაყრდნობით.
ბათუმში გუშინ შტორმმა 5 ბალს გადააჭარბა. ორშაბათს 4-ბალიანი შტორმი ფიქსირდება, ტალღების სიმაღლე 1,6 მეტრს აღწევს. საღამოსთვის შტორმი 2 ბალამდე შემცირდება.
„სანამ ამინდი არ გამოვა, ზღვაში ბანაობა არ შეიძლება. ამჟამად სპეციალური სამსახურები გაწმენდით სამუშაოებს განაგრძობენ. სავარაუდოდ, საღამოს ყველა სამუშაო დასრულებული იქნება“, — განაცხადა ადმინისტრაციის თანამშრომელმა.
კოკისპირული წვიმის გამო ბათუმში რამდენიმე ქუჩა დაიტბორა, ბათუმის ახალ ბულვარზე დაზიანდა ქვეითთა გზა, გადაადგილდა ქვის სკამები, განათების ბოძები სანაპიროზე ჩავარდა. უახლოეს დღეებში სპეციალური სამსახურები მათ თავის ადგილებზე დაამონტაჟებენ.
წყლის ამოტუმბვის სამუშაოები ღამითვე დასრულდა. ორშაბათს დილიდან კოლექტორები ჩვეულ რეჟიმში მუშაობენ.
მოსახლეობა უწყვეტ რეჟიმში იღებს წყალს, ბუნებრივ აირსა და ელექტროენერგიას.
ხელვაჩაურში სახლებს, რომლებიც ძლიერმა ქარმა დააზიანა, დროებით სახურავებს უკეთებენ.
ადგილობრივმა ხელისუფლებამ ზარალის დათვლა დაიწყო.
ოქტომბერში ორკილომეტრიანი სანაპირო ზოლის გამაგრების სამუშაოები დაიწყება. პროექტის განხორციელებაზე ბიუჯეტიდან 12 მლნ ევროს გამოყოფენ, აღნიშნულია აჭარის მთავრობის განცხადებაში.
