თბილისი, 11 აგვისტო — Sputnik. აჭარის მთავრობის მეთაურმა ზურაბ პატარაძემ და სომხეთის გენერალურმა კონსულმა აჭარაში ეგიშე ფარგსიანმა, ტურიზმის განვითარების მიზნით, ერევანსა და ბათუმს შორის პირდაპირი ავიამიმოსვლის დანიშვნის აუცილებლობაზე იმსჯელეს.
შეხვედრაზე მხარეებმა განიხილეს თანამშრომლობა სავაჭრო-ეკონომიკური მიმართულებით და ტურიზმის განვითარების საკითხები. გენერალურმა კონსულმა ერთობლივი კულტურული ღონისძიებების გამართვის მზადყოფნა გამოთქვა.
„აჭარასა და სომხეთის რესპუბლიკას შორის რეგიონულ ჭრილში სხვადასხვა მიმართულებით თანამშრომლობა უკვე წლებია არსებობს. რეგიონს პარტნიორული ურთიერთობები აქვს დაძმობილებულ ქალაქებთან, რაც მომავალში კიდევ უფრო უნდა გააქტიურდეს“, — აღნიშნა პატარაძემ შეხვედრისას.
სომხეთი აჭარისთვის ერთ-ერთი საინტერესო ტურისტული ბაზარია, საიდანაც ვიზიტორების რაოდენობა ბოლო წლებში განსაკუთრებით გაიზარდა.
წლის დასაწყისიდან საქართველოში ჩამოსული ვიზიტორების რაოდენობით სომხეთს მესამე ადგილი უჭირავს.
