თბილისი, 13 ივლისი — Sputnik. აჭარაში 2016 წლის იანვარ-მაისის პერიოდში ჩასული ტურისტების რაოდენობა, გასული წლის ანალოგიურ პერიოდთან შედარებით, 18,5%-ით გაიზარდა.
საანგარიშო პერიოდში რეგიონში იმყოფებოდა 122 268 ტურისტი, მათ შორის — 79 431 უცხოელი, იუწყება აჭარის ტურიზმისა და კურორტების დეპარტამენტი.
მხოლოდ მაისში აჭარას 44 567 ტურისტი ეწვია, მათ შორის 28 884 — უცხოელი, რაც, გასული წლის ანალოგიურ პერიოდთან შედარებით, 18,7%-ით მეტია.
სტატისტიკური მონაცემები რეგიონის ტერიტორიაზე რეგისტრირებული განთავსების ობიექტებიდან (სასტუმროები, ჰოსტელები) შემოსულ ინფორმაციას ეყრდნობა.
მიმდინარე წლის ორი კვარტლის მონაცემებით, აჭარაში თვითმფრინავით 42 268 მგზავრი ჩაფრინდა, რაც გასული წლის ანალოგიურ პერიოდის მონაცემს 74,3%-ით აჭარბებს.
იმ ტურისტების რაოდენობით, რომლებიც საჰაერო ტრანსპორტით სარგებლობენ, ლიდერობენ ისრაელი, ყაზახეთი, რუსეთი, ბელარუსი და ლიტვა.
